真環保與假環保 - 林忌

真環保與假環保 - 林忌


Source : 
http://plastichk.blogspot.com/2009/08/blog-post_09.html


真環保與假環保


巴士最大的污染是甚麼？就是柴油引擎排出的廢氣，特別是歐盟前期、一期的引擎，排放更是後期的幾十倍，甚至過百倍；一直以來長期提出這個問題的，就是我－－林忌，譚凱邦呢？他這年來談到巴士是談甚麼？


看看維基和傳媒發言的紀錄：
「環保觸覺表示希望市民明白在炎熱天氣下車廂內26 至28 度也可接受」
「環保觸覺主要關注部分環境問題，而絕大部分都與都市發展有關。 其關注項目包括：
1. 屏風樓效應
2. 光污染
3. 浪費資源
4. 室內空調溫度過低等。」


巴士冷氣凍不凍，對環境影響大些，還是巴士廢氣對環境的影響大些？巴士開引擎行走，冷氣就算高三度，根本對環境保護沒有幫助，引擎效率與冷氣的效率，本身就無法慳得到能源，但為甚麼明明林忌長期的建議更環保上百倍，為甚麼這個打著環保旗號的譚凱邦先生，對此完全沒有興趣？卻只有興趣拿著一個溫度計，在冷氣風口度到「低溫」，完全不理會乘客的感受？


更過癮係，環保觸覺說：「其實本會多年來一直建議巴士公司改用可開啟式車窗」！好環保呀！


開啟式車窗有咩問題？有開車的朋友一定知。


1. 風阻－－巴士高速行駛時，一架密封的巴士因為有流線型，會大大減輕風阻而減少耗油，反之如果有人開窗，就會做成亂流與風阻，結果就係令巴士燒更多油，而對於歐盟前期或一期的巴士來說，只要少少增加耗油，就已經製造了完全不成比例的污染。


2. 如果有窗，巴士仲需唔需要開冷氣呢？如果需要，即係雙重污染－－風阻造成耗油，打開窗開冷氣造成耗油；唔開冷氣，在巴士開得慢的情況下，即係冇風－－車內會熱死，窗口冇風之餘，因為引擎會有餘熱，因為引擎的溫度都會影響車內的溫度，因此即使冷氣的出風口有風，都只會係熱風。


一個負責任的環保組織，絕對唔會走去處理巴士冷氣，而係會走去處理巴士廢氣；成街的巴士噴黑煙，成街的巴士因為失修問題、老化問題，一開車就成條街都係黑煙，有人手去每架巴士度冷氣幾多度，點解冇人手去捉黑煙巴士？政府唔夠人手去檢控黑煙巴士，佢地有人手卻走去度巴士冷氣，去為了「熱巴」奮鬥？


一個真正的環保組織，係會關心柴油車的廢氣多，定係同環保冇直接關係的冷氣多？


光污染－－林忌呢個「非環保份子」都好奇怪，關注的光害仲多過果 d 口口聲聲關注光害的環保組織；近年香港興了一種服務業，叫做「浴足店」，佢地好喜愛使用五顏六色的招牌，仲要係閃光果隻；這種閃光又紅又黃又藍，離遠望去仲以為係救護車，極度擾民。


點解冇人理呢？正如觀塘區議會為了「國慶六十週年」的燈飾，正如維多利亞公園水池旁有個長年開住冇人睇的政府宣傳片大電視，正如隧道口的「國慶六十週年」廣告板，這些又無聊又唔環保的事情，點解冇環保組織出聲？點解要得我林忌一個去出聲？大家可唔可以解釋畀我聽？


減少資源浪費－－如果連環保團體自己都資源浪費，我地唔可以批評佢？例如一千份「誠實售樓書」，點解這些自稱熱愛環保的人，全部都可以視而不見，當睇唔到就唔存在？


一個真正熱愛環保的人，會否走去印一千份「誠實售樓書」？走去中環當係傳單咁派？要有記者訪問，十份夠啦？最多一百份夠啦？點解要印一千份？


這是宣傳自己的行為，定係環保的行為呀？一個組織打著環保旗號去做反環保的事，更過癮係一大堆自稱環保的人，卻完全不關心這樣的浪費！任何一個真正熱愛環保的人，聽到一千份呢個數，只會係心痛－－絕絕對對心痛如此的浪費。


更過癮的，就係「膠袋稅」減少浪費的講法。
唔知有些環保份子係真唔知，定係假唔知，香港最會浪費的「有錢人家」（包括很多中產）係點樣去超市購物的？


方法一：叫工人去超市買，然後等貨車送貨，貨車係污染高的柴油車，對環境造成的影響，係幾百個膠袋。
方法二：叫工人去超市買野，然後叫佢地搬－－工人帶漏袋，佢地會叫工人去多幾次，如果工人要坐車先去得到，所坐的車所消耗的資源，唔知又點計呢？
方法三：自己開私家車去買，你有冇袋都冇所謂，因為佢有私家車，會成架手推車推去私家車度上貨，又或者行多幾轉。


膠袋稅真正影響最大的是誰？就是中下階層的小市民！他們減少了消費，但他們減少的消費絕對不是「浪費」，而是「生活質素」。


食少兩個生果，食少兩斤菜，食少兩包零食，飲少兩枝飲品－－即使係健康飲品，在這些環保塔利班眼中，原來都係「浪費」！


一方面這些人好似很關心中下階層的生活質素，可是另一方面他們卻認為，因為「怕麻煩」這種人性是錯的，因為人會犯錯「健忘」問題，都係不能饒恕的，因此膠袋稅絕對係「小事」，難道他們家全部都是用菲傭？難道他們從未見過阿媽辛辛苦苦的一包兩包帶回家？特別係有一段距離先回到家？


事不關己，己不勞心，對很多人很麻煩的大事，對於他們就是小事；因此有更環保的事不做，他們就要選擇這種對自己影響最細，對部份無助的人影響最大的事，去支持政府收稅！


要減少浪費？立法禁止超市送貨上門啦！立法禁止香港人請外傭啦！最有效的，就是效法德國的做法，勒令全香港硬性下午六時收工，除超市、飲食業之外，六點後不准營業！


為甚麼不？為甚麼外國樣樣野都可以引入，偏偏這個最立竿見影的，他們就不敢引進？


那些針對發電廠，針對特首做「氣候逃犯」的環保組織，如綠色和平，林忌一直都致以最高的敬意，因為即使有些政見上的不同，正如本土行動的菜園問題，林忌本身亦不太明白；但凡是真正為了社會出了一分力的，我都會盡全力去幫，盡全力去維護他們的自由與理想！


反之，那些有環保事唔做，專做埋一些假環保議題用來作政治資本的，對唔住，既然佢可以從政，既然佢可以參選立法會，那麼我們就可以政治人物的標準，去審視佢的所作所為－－因為譚凱邦唔再係普通的環保份子，而係一個參選的政治人物！
張貼者： 林忌 
-------------------------------------------



http://www.facebook.com/greenbuses
http://www.facebook.com/groups/130472513662654/



意見


Source : 
http://plastichk.blogspot.com/2009/08/blog-post_09.html


關於"建議巴士公司改用可開啟式車窗"呢個問題, 我有話要說.


有開過車的人, 都知道在低速行走的情況下, 開冷氣造成的耗油量, 比開窗造成的風阻, 更消耗能量. 


在私家車上, 要到80km/h或以上, 開冷氣才會比開窗更慳油. ( excluded the extra energy used for AC )


香港的巴士, 即使在公路, 都只能以70km/h行走. 所以, 巴士不開冷氣, 絕對能慳到油.


另外我認為, 在秋季和冬季, 大部份乘客都不會介意坐熱狗巴士. 如果巴士車窗能自由開關, 巴士公司就可在秋冬增強熱狗服務, 乘客慳車費之餘, 巴士公司亦可慳油. 至於夏季乘客亂開車窗問題, 只要加個鎖就得, 十分容易執行.


所以, 我是支持巴士公司引入可開關車窗的巴士.


------------------------


但我唔多認同你話向巴士度開冷氣幾大都一樣咁蝕電講法lo..
換個比喻洗1蚊同洗3蚊會唔會無分別 
就咁3蚊都由至少2個硬幣組成點都重d
點都唔一樣掛


------------------------


私家車一般天氣開冷氣會令耗油量增加4%左右


而印度一個研究指出於濕熱天氣中一部45座巴士開冷氣會令耗油量增加60%(冬天) 至82%(夏天)。當然，國情不同，印度的巴士未必有香港的先進、未必有香港的大部、而天氣都比香港更極端。
我手上無香港雙層巴士的數據，但至少可以從印度的研究中得知車開冷氣會令耗油量升高的事實，基本上可以叫常識。你渣私家車 (假設係自動波)上斜路唔夠力第一件會做的事係乜？一定熄冷氣先啦！


風阻方面，私家車在高速公路行70mph (~110kmh) 開窗會耗油不多於4%。私家車行70kmh 開窗基本上比關窗開冷氣耗油會低一點。放大層面到巴士，巴士方面數據我冇，但係你有冇？


林生你一邊用你自己渣私家車的「體驗」、「常識」去理解巴士風阻、冷氣的問題，卻一邊同時將其「無限放大」成巴士的來反駁其他網友對你論點的質疑，卻無提出數據......我覺得有少少自相矛盾。


---------------------------------------------------------


如果不開冷氣或冷氣開細一點不能節約能源，那麼你等於打破了能量不滅定律了。


我討厭冷氣巴、你喜歡冷氣巴，是出自各自的經驗，這點無法辯駁。
但要支持開冷氣，也不能夠把道理反過來說。
開冷氣與否，對能源消耗和排放當然有影響。


-----------------------------------------------------------------------------------


普通3000cc私家車兩噸唔夠，200匹多少少
坐四個人


雙層巴士又點？隨便舉個例富豪比較新的巴士，B10TL (我自己對巴士都唔太熟)，9600cc，但係都只係有285匹，重量方面唔洗多講你都知有幾重...


巴士用冷氣機我記憶中最輕的都重大約150kg，當然愈舊愈重。


我要講的係，冷氣對大cc 私家車表現影響的確唔太大，我自己屋企有部3500cc房車，我拎去飛大帽山開盡冷氣一樣咁正；但係巴士唔同，巴士雖然大cc但係其馬力唔係你想像中的高，冷氣對耗油量 (以至排放)的確有好大影響。


呢個環保組織提議25.5度，你需要由乘客舒適感角度出發去反對其建議，而唔係由冷氣機食唔食油的角度出發。因為一講到耗油量你一定會理虧。冷氣愈凍愈食油、部巴士冇冷氣一定比有冷氣行得更爽係不變的定理，點樣樣去將乘客舒適感同巴士排放作一個平衡先係真正研究的重點。巴士冷氣每低一度平均就要多1%油。


你可能覺得1%微不足道，
但係用環保人角度出發每一個% 都好重要。換新車可以將排放減低例如20%，但係將舊車冷氣調高5度就直接可以慳5%，你會唔會覺得相對地平 + 容易 + 比較快捷？ 訂一部車都要等一年左右先運到香港。


當然都要睇舒適度，我渣屋企果部3500cc 車我渣的話set 冷氣24度、我呀媽就set 22度。巴士25度我可以接受，但係再熱少少的話我會寧願渣車都唔坐巴士。


我好同意你講更新車隊比熄冷氣重要，但係換新車一來時間耐，二來「湯」車唔係你想像中的環保。保養方面我都同意你要做得更密，但係我都保留透過改裝引攣去做到減排效果的選擇...